அவள் ஜீவனுள்ளோருக்கெல்லாம் தாயானவள்

இயேசு கிறிஸ்துவை குறித்துச் சொல்லும் பொழுது, வேதாகமம் அவரை ஒரு விதையில் இருந்து முளைத்த செடி என்று சொல்லமால், வேரிலிருந்து முளைத்த கிளை என்றே சொல்லுகிறது, ஏனென்றால் விதையில் இருந்து முளைத்த செடிக்கு வயது இருக்கும், ஆனால் வேரிலிருந்து முளைத்த கிளைக்கு வயது கிடையாது, அது அந்த மரமாகவே கருதப்படும், அதே போல் தான் குமாரனாகிய இயேசு கிறிஸ்துவும், பிதாவின் அடிமரத்திலிருந்து உண்டான துளிராகவும், அதின் வேர்களிலிருந்து எழும்பும் கிளையாகவும், அவரே நமக்கு தேவனாகவும் இருக்கிறார் - 1.ஈசாயென்னும் அடிமரத்திலிருந்து ஒரு துளிர் தோன்றி, அவன் வேர்களிலிருந்து ஒரு கிளை எழும்பிச் செழிக்கும். 2.ஞானத்தையும் உணர்வையும் அருளும் ஆவியும், ஆலோசனையையும் பெலனையும் அருளும் ஆவியும், அறிவையும் கர்த்தருக்குப் பயப்படுகிற பயத்தையும் அருளும் ஆவியுமாகிய கர்த்தருடைய ஆவியானவர் அவர்மேல் தங்கியிருப்பார் - ஏசாயா 11:1-2

இந்த விளக்கத்தை தான் வேதாகமம் முழுவதும் பார்க்கிறோம், ஆதாம் மற்றும் ஏவாளின் படைப்புகளும் இதையே முன்னிறுத்துகிறது, எப்படியெனில் ஜீவாத்துமாவாக படைக்கப்பட்ட ஆதாம், நம் பிதாவாகிய தேவனுக்கு அடையாளமாக இருக்கிறார் - தேவனாகிய கர்த்தர் மனுஷனைப் பூமியின் மண்ணினாலே உருவாக்கி, ஜீவசுவாசத்தை அவன் நாசியிலே ஊதினார், மனுஷன் ஜீவாத்துமாவானான் - ஆதியாகமம் 2:7 

ஏவாள் நமது கர்த்தரும் இரட்சகருமாகிய இயேசு கிறிஸ்துவின் அடையாளமாக இருக்கிறார், அதனால் தான் ஏவாள் ஆதாமை போல் மண்ணிலிருந்து உண்டாக்கப்படாமல், பிதாவின் மடிக்கு ஒப்பான ஆதாமின் விலா எலும்பிலிருந்து உண்டாக்கப்பட்டாள் - 21.அப்பொழுது தேவனாகிய கர்த்தர் ஆதாமுக்கு அயர்ந்த நித்திரையை வரப்பண்ணினார், அவன் நித்திரையடைந்தான்; அவர் அவன் விலா எலும்புகளில் ஒன்றை எடுத்து, அந்த இடத்தைச் சதையினால் அடைத்தார். 22.தேவனாகிய கர்த்தர் தாம் மனுஷனில் எடுத்த விலா எலும்பை மனுஷியாக உருவாக்கி, அவளை மனுஷனிடத்தில் கொண்டுவந்தார் - ஆதியாகமம் 2:21-22

அதே சமயத்தில் நம் பிதாவாகிய தேவனும் நம் கர்த்தரும் இரட்சகருமாகிய இயேசு கிறிஸ்துவும் தனித்தனி நபர்களாக இருந்தாலும், ஒரே தெய்வமாக இருக்கிறார்கள் என்பதை தான் இந்த வசனங்கள் விளக்குகிறது - 23.அப்பொழுது ஆதாம்: இவள் என் எலும்பில் எலும்பும், என் மாம்சத்தில் மாம்சமுமாய் இருக்கிறாள்; இவள் மனுஷனில் எடுக்கப்பட்டபடியினால் மனுஷி என்னப்படுவாள் என்றான். 24.இதினிமித்தம் புருஷன் தன் தகப்பனையும் தன் தாயையும் விட்டு, தன் மனைவியோடே இசைந்திருப்பான்; அவர்கள் ஒரே மாம்சமாயிருப்பார்கள் - ஆதியாகமம் 2:23-24

இப்படி ஏவாள் நமது கர்த்தரும் இரட்சகருமாகிய இயேசு கிறிஸ்துவின் அடையாளமாக இருந்ததினால் தான் "அவர்" என்று அழைக்கப்பட்டாள் - 13.அப்பொழுது தேவனாகிய கர்த்தர் ஸ்திரீயை நோக்கி: நீ இப்படிச் செய்தது என்ன என்றார். ஸ்திரீயானவள்: சர்ப்பம் என்னை வஞ்சித்தது, நான் புசித்தேன் என்றாள். 14.அப்பொழுது தேவனாகிய கர்த்தர் சர்ப்பத்தைப் பார்த்து: நீ இதைச் செய்தபடியால் சகல நாட்டுமிருகங்களிலும் சகல காட்டுமிருகங்களிலும் சபிக்கப்பட்டிருப்பாய், நீ உன் வயிற்றினால் நகர்ந்து, உயிரோடிருக்கும் நாளெல்லாம் மண்ணைத் தின்பாய்; 15.உனக்கும் ஸ்திரீக்கும், உன் வித்துக்கும் அவள் வித்துக்கும் பகை உண்டாக்குவேன்; அவர் உன் தலையை நசுக்குவார், நீ அவர் குதிங்காலை நசுக்குவாய் என்றார் - ஆதியாகமம் 3:13-15

அது மாத்திரம் இல்லாமல், நாம் இயேசு கிறிஸ்துவின் சிலுவை பாடுகளினால் மாத்திரமே, அவரின் பிள்ளைகளாக முடியும் என்பதை தான் இந்த வசனங்கள் தீர்க்கதரிசனமாக சொல்லுகிறது,  இதில் ஸ்திரீ என்கிற வார்த்தை எபிரேய பாஷையில் ஈஷா(ʼishshâh) என்று அழைக்கப்படுகிறது, அது நம்மை சிலுவையின் பாடுகளினால் பெற்றெடுத்த இயேசு கிறிஸ்துவே -  அவர் ஸ்திரீயை நோக்கி: நீ கர்ப்பவதியாயிருக்கும்போது உன் வேதனையை மிகவும் பெருகப்பண்ணுவேன்; வேதனையோடே பிள்ளை பெறுவாய்; உன் ஆசை உன் புருஷனைப் பற்றியிருக்கும், அவன் உன்னை ஆண்டுகொள்ளுவான் என்றார் - ஆதியாகமம் 3:16

இப்படி  நம்மை சிலுவையின் பெற்றெடுத்த இயேசு கிறிஸ்துவே ஜீவனுள்ளோருக்கெல்லாம் தாயானவள் - ஆதாம் தன் மனைவிக்கு ஏவாள் என்று பேரிட்டான்; ஏனெனில், அவள் ஜீவனுள்ளோருக்கெல்லாம் தாயானவள் - ஆதியாகமம் 3:20